مدیر مسئول : دکتر حسین شرقی دره جک
SORUMLU MÜDÜR-BAŞ YAZAR:
DR.HÜSEYN ŞƏRQİDƏRƏCƏK
سئوگی سئون اوچون زهر کیمی اولسا دا سئویلنه بال دیر. سئوگی اصلینده بقانین غایه سی دیر. اولومون و وار اولوشون تملی دیر اونا گوره کی اولو تانری بیزی اوز سئوگیسیندن یاراتمیشدیر. یئر کوره سی و انگین فضانی بیزه اوز سئوگیسیندن ارمغان ائتمیشدیر.
سئون پارچالانیر سئویلن ایسه بوتولشیر و یاشاییر. اونا گوره ده سئوگی حیاتین تومورجوغودور. سئوگی مختلیف فورماتلاردا اولور :
1. مال و ثروت
2. وطن سئوگیسی
3. الله سئوگیسی (ایدئولوژی اینانم)
4. گوزللیک سئوگیسی
5. قادین یا ارکک سئوگیسی
6. ائولاد سئوگیسی
7. اوزونه سئوگی و ...
آنجاق بوتون بونلاردا بیر عاشیق و بیر معشوق واردیر. معشوق سئوگی دئیلن حسسین قربانی یادا آلتی دیر. البته سئوگی دوشونمه دن یارانان حیس دیر. و هیچ بیر
اونگورو یادا سیفاریشله اولمور. عقلین گیزلی قاتیندا و اوره یین سیرر پرده سینین آرخاسیندا فورمالاشیر. البته هیجان و نیاز حیسی بونا مداخیل دیر.
شددتی و ضعفی سئویله نین نه درجه ده اوزونو سئودیرمه ییندن آسیلی دیر.
میثال اوچون لیلی و مجنون و بیر چوخ رئال سئوگیلری آد چکمک اولار. آنجاق ائله سئوگیلر وار کی ؛ اونلار ژنتیک کدلارلا اینسانین یارادیلیش مایه سینده احتیوا اولونور. بسیط سئوگی ایله یئر دن گویه قدر فرقلی دیر. میثال اوچون وطن ؛ یورد و میللت سئوگیسی بو ماهیت دن دیر. سئون سئوگیسی اوچون اولومو گوزه آلیر.
سئویلن ایسه دوغوشون شفقلرینین ترنمی اولار. سئومک اولایی غریبه حیسلردن و آنی دن اولور. سئوگینین اولوشوموندا ذکا رل اوینامیر. عقل کورالیر گوز ایسه کور اولور. اصلینده سئوگی اولومون (olumun) اولومدن (ölümddən) دوغوشدور.
نئجه کی انسانین روحو بدنیندن آیریلاندا اونا ان گوزل سرخوشلوق ال وئریر سئومک ده عینی بو سرخوشلوغون اوزودور. لاکن اولمه دن باش وئریر. بیین دیریدی قلب ایسه باشقا عالم ده سیر ائدیر. وطن اوچون شهید اولان اینسان دا بو حیسلری وطنی اوچون یاشاییر. اونا گوره اونودولمور. اصیل سئوگی فاتحلیک دیر اونودولماز. آنجاق سئوگینی بیلمه ین ساختا فاتحلر قیسا زاماندا اونودولارلار.
نه موتلو سئونلره...