SORUMLU MÜDÜR VƏ BAŞ YAZAR: Dr.HÜSEYN ŞƏRQİDƏRƏCƏK SOYTÜRK

مدیر مسئول و سردبیر : دکتر حسین شرقی دره جک (سوی تورک)

منیم آدیم اوزگورلوک سنین آدین ایسه دمکراسی اولسون . البته بیز بیر بیریمیزه مکمل اولساق دا یوز ایللر بویو اوزاغیق. ایکیمیزین ده یولو قیرمیزی و قان رنگین ده دیر.ایکیمیزین ده گوزو آغلار و جانی سیزلاردیر. ایکیمیزدن ده قورخارلار.

بیریمیز بایراق اولساق او بیریمیز اونون دیره یی دیر. پارا و رانت سئودالیلاری بیزی سئومزلر. اونا گوره کی اونلار قارانلیغی بیز ایسه آیدینلیغی سئوریک. اونلار سلاحی , اولدورمه نی و غارتی چوخ ایسترلر بیز ایسه صولحو و باریشی دیرلندیرریک. اما گل گورکی سن هارداسان من هاردا؟ اوخشارلیغیمیز چوخ اولسادا تاسف کی ؛ اوزاغیق بیر- بیریمیزدن. من دلی و جسور و دلی قانلی اولسام دا سن چوخ تمکینلی و صبیرلیسن.

من قاینار قازانام سن ایسه سیجاق بیر یووا اودورکی ایکیسینی بیر آرایا گلمه یه قویمورلار.

غریبه دیر قونشو خالقلاردا بونلار یاناشی یاشاسالاردا بورالاردا بونلار هیچ گورونمور.

بو یاخینلاردا دینی و دیلی بیر اولان قارداش تورکیه ده ده بونلار بیر آریا گلمه یه باشلادیلار. اوزگورلوک و دمکراسی یعنی حضرت مولانانین دئدیی کیمی " اولدوغون کیمی گورون و گوروندویون کیمی اول" بلی بو قدر قیسا دیر اوزون اوازادی تعریفلرین ایچ مفهوملاری.

تورکیه ده جمهورباشقانلیغی یاریشینین دوزگون و عدالتلی گئچیریلمه سی البته کی بیزلره و دونیا مسلمانلارینا او جمله دن قونشولارا و تورک دولتلری بیرلینه ده اورنک تشکیل ائتمکده دیر.

گورسن بو اوزون یوللارین قیسا نتیجه لری نه قدر مهم دیر.

100 ایل جمهوریت تاریخینده باشی چوخ بلالار چکن تورکیه اوز دوست و دوشمنلرینه " تورک دمکراسی و اوزگورلوک " درسی وئردی.

بلی اوز الی – اوز باشی اولاندا آدام دا یولون ایری و دوزلویونو کشف ائدیر.

دئییرم اوزگورلوک و دمکراسینین بیرتمل قارداشی دا وار گلین اونودا بو یول دا اوزوموزه یولداش ائدک. اونون آدی ایسه سئوگی دیر.اوزگورلوک ؛ دمکراسی و سئوگی .

اینانیرام بونلار اوزون یولون قیسا سونوجلاری دیر.