SORUMLU MÜDÜR:Dr.HÜSEYİN ŞƏRQİDƏRƏCƏ SOYTÜRK

 مدیر مسئول : دکتر حسين شرقي دره جک سوي تورک

آذربايجانين ان قديم دؤورلريندن تورک يوردو اولماسينا داير سون دؤورلرده بير چوخ فاکتلار اوزه چيخيب و قييمتلي اثرلر يازيلميشدير. اوزون مدتشووينيزمین آرياچيليق دوشونجه سي، ائلجه ده ايران شاهلیق دونه می و سووئت دؤولتلري نين آنتي-تورک سياستلري آذربايجان تاريخي نين اوبيئکتيو آراشديريليب يازيلماسينا و آذربايجان تورکجه سي تاريخي نين قديمليگي نين اوزه چيخماسينا کؤلگه سالميشدير. لاکين آتا-بابالاريميز دئميشکن: «گونش هميشه ليکله بولود آلتدا قالماز». آرتيق سووئتلر بیرلیی داغيلميش، آذربايجانتورکلری يئنی دونيادا ارتباطات و معلوماتلانما ساحه سينده جيدي ايره ليليشلر الده ائده رک، هانسيسا دوزگون اولمايان غرضلي تبليغاتين اوستونون آچيلماسينا داها تئز شرايط و ايمکان يارادير.

شووينيستلر زامان-زامانآذربايجاندا تورکلرين گليب مسکن سالماسي نين سون دؤورلرده باش وئرمه سيني سؤيله مه يه چاليشيرلار. پهلوي دؤوروندن شووينيزم ايران دؤولتي نين رسمي دؤولت سياستينه چئوريلميش و مقصديؤنلو اولاراق احمد کسروي کيمي شخصلر آذربايجان تاريخيني اويدورمالارا و تحريفه سؤوق ائتمه يه باشلاديلار.

احمد کسروي «آذربايجان يا زباني باستاني آذربايجان» آدلي اثرينده سلجوقلارين 10 جو عصرده آذربايجانا گؤچمه سي ايله آذربايجانين تورکلشمه سيني يازير. او همين کيتابي نين 21-جي صحيفه سينده تورک ديلي نين آذربايجاندا ياييلماسيني 70 ايلليک قاراقويونلو و آغقويونلولارين حاکيميتي دؤورو ايله باغلايير. ماراقليسي اوراسيندادير کي، همين اثرين سونراکي صحيفه سينده تورک ديلي نين آذربايجاندا عوموميلشمه سيني، صفوي دؤورونه آيد اولماسيني قيد ائدير.1

بئله اويدورولموش فيکيرلري تبليغ ائدن کسروي نين داوامچيلاري آز دئييلدير. اونلاردان بيري ده حدسيز درجه ده عيرقچي اولان جواد شيخ ال ايسلاميدير. او،آذربايجاندا 30 ميليوندان آرتيق آذربايجان تورکونو فارسلاشديرماق مقصديله بئله بير پلان تکليف ائتميشدير. اونون پلانينا اساسن آذربايجانلي اوشاقلاري آتا-بابالاريندان آليب فارس شهرينده فارسلارا وئرمک لازيمدير کي، اونلارين واسيطه سيله تربييه ائديلسين. بئله ليکله 50 ايل مدتينده آذربايجانين فارسلاشديريلماسي نظرده توتولور.2

لاکين بونلارين هاميسي آذربايجان خالقي نين سويکؤکونو تحريفه سؤوق ائديب، اونلاري فارسلاشديرماق، روسلاشديرماق و بير سؤزله آسيميلاسیونا اوغراتماقدان باشقا هئچ بير اهميت کسب ائتمير. دئديگيميز کيمي، آذربايجان تورکلري نين باشي اوستوندن قارا بولودلار چکيلدي و حقيقت گونشي اؤزونو گؤسترمه يه باشلادي. بير چوخ آوروپالي عاليملر شومئرلرين تورک اجدادي اولماسي قناعتينه گلمه لري و بونو ائتديکلري تدقيقاتين ثوبوت ائتمه سي آرتيق اؤزونو گؤستردي.

مثلن اينگيليس عاليمي س. للويد و ق. چايلد يازيرلار: «تورانليلار تخمينن 10-12 مين ايل بوندان قاباق صفالي، بهره لي، دجله و فرات چايلاري حؤوضه سينده مسکن ساليب، اطرافيندا ياشايان سايسيز-حسابسيز وحشي قبيله لرين حئيرتلي نظرلري آلتيندا دونيا سيويليزاسيياسي نين سحريني آچديلار. دونيادا اولو بير مدنيتين مشعلي آليشدي. بو ايشيق احتيياجي داخيلدن گليردي و چوخ چکمه دي کي، قوجا آسيانين مونبيت تورپاقلي هر گوشه سينده ايشيق آلوولاري شعللندي».3

بو ساحه ده اؤز عاليملريميز ده چوخ قييمتلي اثرلر يازيب-ياراتميشلار.آذربايجانلي عاليم و تدقيقاتچي، مرحوم پروفسور م.ت. ذهتابي موختليف منبعلري آراشديراراق چوخ قييمتلي «ايران تورکلري نين اسکي تاريخي»ني يازميشلار. اونون همين اثري آذربايجان تاريخ علمينده يئني دؤورون باشلانغيجي کيمي گؤتوروله بيلر. ذهتابي همين اثرينده واحيد مدنيت و اينجه صنعت آتموسفئري اولان بؤيوک بير بؤلگه ني موعينلشديرميشدير. او، آوروپالي، بير چوخ باشقا خالقلارين تدقيقاتچيلار و آرخئولوقلاري نين کشفلرينه اساسلاناراق بئله بير وئرسييا ايره لي سورور کي، تورکوستان، آذربايجان، زاقروس داغلاري، ايکيچاي آراسي و اطراف اراضيلر واحيد مدنيت و اينجه صعنت آتموسفئري نين تاثيري آلتيندا اولموشدور. بونو داها چوخ همين اراضيلرده تاپيلميش واحيد مدنيت قاليقلاري سوبوت ائدير.4

عئيني زاماندا تورکلوکلري ثوبوت ائديلن شومئرلرله چاغداش اولانآذربايجاندا آراتتا دؤولتي ديقتي جلب ائدير. بيي اؤلکه ايله علاقه لر (تاریخدن اونجه 3 جو مين ايلليگين1- جی ياريسي) حاديثه لر بير نئچه شومئر داستانيندا («ائن مئرکار و آراتتا حاکيمي»، «ائن-مئرکار و ائن-شوکوشسيراننا»، «ان-مئرکار و لوقالباندا»، «لوقالباندا و هورروم داغي» ) عکس اولونموشدور.»5

پروفسور ذهتابي «ايران تورکلري نين اسکي تاريخي» آدلي اثرينده چوخ ماراقلي بير وئرسييا ايره لي سورور. او دئيير کي، شومئرلر اورتا آسيادان خزرين شيمالي، دربند و داريال کئچيدلري ايله آذربايجاندان ايکيچاي آراسينا کؤچرکن هله تاریخدن اونجه 5 عصرده اونلاردا موعين طايفالار و بويلار آيريليب آذربايجان و زاقروس داغلاريندا مسکن سالميش، سونرالار آراتتا، قوتتي، لوللوبي، کاسسي و س. دؤولتلري ياراتميشلار.6

آذربايجانين قديم تورکلرين مسکه ني اولماسينا ايسلام عاليملري و تاريخچيلري ده ايشاره ائتميشلر. «عرب تاريخچيسي ايبن حشام اؤز اثرينده يازير:" دؤورون خليفه سي عبيده سوال وئرير کي، تورک و آذربايجان ندير. اعبيد ده جاوابيندا دئدي- آذربايجان قديمدن تورکلرله مسکون بير اؤلکه دير " .7

آذربايجاندا تورکلرين ياشاماسينا عرب-فارس تاريخچيلريندن ابو العلا محمد بلعمي ده ايشاره ائتميشدير. ساماني دؤولتي نين وزيري اولموش ابو العلا محمد بلعمي «تاريخي بلعمي» آدلي اثري نين 42-جي صحيفه سينده آذربايجانين تورکلرين الينده اولماسينا ايشاره ائدير.

 آذربايجاندا چوخ قديملردن آذربايجان تورکجه سي مؤوجود اولموش و ديليميز بير چوخ ساحه لرده ايشله ديلميشدير.آذربايجان تاريخي بويو خطایي، صايب تبريزي، شيخ قاسيم انور، حقيقي، وحيدي تبريزي، قووسي تبريزي و بير چوخ مشهور شاعيرين بويا-باشا چاتديغي اراضي اولماقلا ياناشي همين بؤلگه ده نثريميزه ده «قارا مجموعه» کيمي بؤيوک تؤهفه لر وئرميشدير. شيخ صفي موريدلرينه تعليم کيتابي کيمي يازديغي همين کيتاب يعني «قارا مجموعه» آذربايجان نثري اوچون چوخ قييمتلي اثردير. عئيني زاماندا نظره آلماق لازيمدير کي، شاه اسيماعيل صفوي دؤورونده تبريز آذربايجانين پايتاختي اولارکن آذربايجان تورکجه سي هله او دؤورده رسمي دؤولت ديلي اولموش، باشقا ميلتلر ده هر دؤوردن داها چوخ بيزيم معنوي مدنيتيميزدن قيدالانماغا باشلاميشلار.

 آذربايجاندا زامان-زامان آذربايجان شعري و نثرينه آيد چوخ بؤيوک شاعيرلر و يازيچيلار ميدانا چيخميش، ديليميز و مدنيتيميز اثرلر خزينه سينه چوخ قييمتلي اثرلر توهفه ائتميشلر. عئيني زاماندا ديليميز و ادبياتيميزلا بيرباشا باغلي اولان فوضولي نين تورکجه «ديوان»ي بيرينجي دفعهاولاراق 1828-جي ايلده تبريز شهرينده چاپ ائديلميشدير. «تبريز شهرينده بؤيوک آذربايجان شاعيري فوضولي نين «ديوان»ي 1828-جي ايلدن باشقا يئنه بو شهرده 1831-1849-1854 و 1857-جي ايللرده ده چاپ ائديلميشدير. لاکين تبريزدن سونرا «بولاق» مطبه سينده 1838-ده و سونرادان ايستانبولدا، خيوه ده، داشکندده و 1844-جو ايلده ايسه باکيدا چاپ ائديلميشدير»8.

تبريزده آذربايجان تورکجه سينده هله 19-عصرين بيرينجي ياریسيندان کيتاب چاپي ديليميزين اهميتي وآذربايجانين تبريز باشدا اولماقلا مدنيت اؤنجولو اولماسيندان خالقيميزين همين بؤلگه ده ديليميزين قورونماسينا اهميت وئرمه سيندن ايره لي گلير. اوزون مدت ساراي آداملاري و شاهلار ديليميزين تکجهآذربايجاندا دئييل، حتّی بوتون آذربايجاندا اينکيشافينا تضييق گؤستريب،مانع اولوردولار. لاکين زامان-زامان ضياليلاريميز و خالقيميزين غئيرتلي اؤولادلاري اؤز ديللري اوغروندا موباريزه ائتميش، اونون اينکيشافينا، ياييلماسينا و خالقيميزين معاريفي ساحه سينده جيدي شکيلده فعاليت گؤسترميشلر.

حتّی تورک دؤولتي اولان قاجارلار زاماني بئله بعضن تورکديللي کيتابلارين چاپي، تورکديللي نشرلرين ياييلماسينا محدوديتلر قويولوردو.

 آذربايجاندا و تبريزده مشروطه اينقيلابي و اينقيلاب عرفه سينده آذربايجان تورکجه سينده بير چوخ قزئتلر نشر ائديلير، ضياليلاريميز و آيدينلاريميز طرفيندن خالقا موعاصير و موترققي فيکيرلر آشيلانير. همين دؤورده ده «آذربايجان قزئتي تبريزده 1907-جي ايلده و آنا ديلي ايسه همين شهرده 1906-جي ايلده عدالت قزئتي نين علاوه سي اولاراق نشر ائديليردي.»9

مشروطه اينقيلابيندان قاباق و اينقيلاب عرفه سيندهآذربايجاندا آذربايجان تورکجه سي نين ايشلنديگي ساحه لردن بيري ده همين ديلين او دؤورون تحصيل اوجاقلاريندا تدريسيندن عيبارت ايدي. تبريزلي پئداقوق، گؤرکملي عاليم و معاريفچی شخصيت ميرزه حسن روشديه اوزون مدت شيمالي آذربايجاندا ياشامالي اولموشدور. او، شيمالي آذربايجاندا دا پئداقوژي فعاليتله مشغول اولموش، ايرواندا بير مکتب ده آچميشدير. ميرزه حسن روشديه ايرواندا آچديغي مکتبي 1888-جي ايلده ترک ائديب زنگين پئداقوژي تجروبه ايله تبريزه گئدير.

«1893-جو ايلده تبريزده يئني اوصوللا تاسيس ائديلميش و ساواد تعليمينده موعاصير مئتودلاردان ايستيفاده اولونان روشدیهمظفرييه بوتون ايراندا ايلک موعاصير ايبتيداي مکتب ايدي. روشديه نين آچديغي يئني اوسلوبلو مکتبين ان بؤيوک اهميتي بوندان عيبارتدير کي، بورادا ساواد تعليمي آنا ديلينده آپاريليردي». "

خياباني حرکاتي دؤورونده دهآذربايجاندا آذربايجان تورکجه سي گئنيش شکيلده ايستيفاده ائديليردي. حرکاتين باشچيسي شيخ محمد خياباني اودلو چيخيشلاريني آذربايجان تورکجه سينده آپاريردي. همين دؤورده چوخلو قزئتلر و ژورناللار بوراخيليردي. آذربايجان دئموکرات پارتيياسي نين اورقاني اولان «تجددود» قزئتي همين دؤورده بوراخيلماغا باشلادي. بوندان علاوه«ازاديستان» ژورنالي دا بوراخيلماغا باشلاميشدير. همين دؤورده بوراخيلان ژورناللاردان بيري ده «دب» ژورنالي ايدي. همين قزئت و ژورناللاردان اوزون مدت بوراخيلان «تجددود» قزئتي ايدي. «حرکاتچيلار بو تريبونادان عقيده و سسلريني هر بير يانا چاتديريرديلار:

تجددود اولوب عوصيانين گور سسي،

گزي بؤلگه-بؤلگه اونون نغمه سي.

آييلدير ياتان هر بير کسي،

يازير دورمادان فيرقه نين حاق سؤزو.

آچير خالقا اددوله نين ايچ اوزو

و يول گؤسترير عوصيانا.. .».12

قديم تاريخه و ايفتيخارلي کئچميشه ماليک اولان آذربايجان خالقي گولوستان و تورکمنچاي موقاويله لري ايله ايکييه پارچالانديقدان سونرا بير-بيريندن فرقلي طالع ياشامالي اولدولار . بو آز دئييلدي، 1925-جي ايلده اينگيلتره دؤولتي نين ال آلتيسي اولان رضا خان تدريجن دؤولت چئوريليشي نتيجه سينده ايراندا شاه اولدو. بئله ليکله، تورک سلاله سي اولان قاجار دؤولتي شووينيست سياستي يئريدن پهلوي سلاله سي ايله عوض ائديلدي. رضا شاه حاکيميته گلديکدن سونرا مرکزلشميش دؤولت ياراتدي و فارس شووينيزمي دؤولتين آنا سياست خطينه چئوريلدي. ايرانین هر طرفينده ياشايان آذربايجان تورکلري نين ديلي ياساق ائديلدي. آذربايجانليلار تورک اولمالارينا گؤره تحقير، تعقيب و تضييقه معروض قاليرديلار. آذربايجان ديلي بوتون مکتبلردن، رسمي اورقانلاردان، تئاتر، اينجه صنعت، علم و س. ساحه لردن زورلا اوزاقلاشدیریلدی .بئله حاقسيزليغا دؤزمه ينخالق پيشوري نين باشچيليغي ايله ميللي آزادليق حرکاتينا باشلايير و 1945-46-جي ايلده 21 آذر حرکاتي ايله ميللي حؤکومت قوردولار. تخمينن بير ايل مدتينده داوام گتيرن همين حؤکومتآذربايجاندا ميللي زمينده چوخلو ايشلر گؤردو،آذربايجاندا قورولموش آذربايجان ميللي حؤکومتي آذربايجان تورکجه سي حاقيندا بئله بير قرار قبول ائتدي:

1. " بو گوندن اعتيبارن آذربايجاندا، آذربايجان ديلي رسمي دؤولتديلي اعلان اولونور...

2. بوتون ايداره لر (دؤولت، ميللي، تيجارت و ايجتيماعیت) اؤز ايشلريني

آذربايجان ديلينده يازماغا مجبوردورلار... " 13

ميللي حؤکومتين داوام گتيرديگي 1 ايل مدتينده آذربايجان تورکجه سينده چوخلو اثرلر و درسليکلر چاپ ائديليردي. آذربايجان تورکجه سينده اونيوئرسيتئت (دانشگاه)، مکتبلر، تئاتر، موسيقي اورکئستري و س. آچيلدي." آز بير زاماندا تبريز و آذربايجانين ويلايت مرکزلرينده آنا ديلينده يئني قزئت و مجموعه لر نشر ائديلمه يه باشلادي.

تبريز شهرينده آذربايجان ميللي مجليسي نين اورقاني" آزاد ميلت " ، آذربايجان همکارلار ايتتيفاقينین اورقاني" غلبه"، آذربايجان دئموکرات گنجلر تشکيلاتي نين اورقاني" جاوانلار " ،" يئني شرق " ،" فرياد " ، اردبيل شهرينده" جؤودت " ، اورميه شهرينده" اورميه " ، زنجان شهرينده" آذر "قزئتلري، تبريز شهرينده" شفق " ،" دئموکرات " ، آذربايجان شاعيرلري جمعيتي نين اورقاني" گونش " ،" آذربايجان " ،" مدنيت، مييانادا" وطن "و س. مجموعه لري گؤسترمک اولار " .14

 عئيني زاماندا همين دؤوردهآذربايجانين دؤولت راديوسونون دا اساسي قويولموشدور." 1946-جي ايل آپرئلين 7-ده بازار گونو اساسي قويولموش تبريز راديوسو هر گون گون اورتادان سونرا ساعات 4-ده اورتا دالغا 310 مئترده ايلک دفعهوئريليشه باشلاميشدير. " 15

گونئي آذربايجاندا همين دؤورده آذربايجان تورکجه سينده دؤولت هيمني ديقتي جلب ائدير. " آذربايجان ميللي هيمنيني خالقيميزين قوجامان و موباريز شاعيري سيد مهدي اعتيماد ناطيق يازميش، موسيقيسيني ايسه جاهانگير جاهانگيرزاده ترتيب ائتميشدير. همين ميللي هيمنين بيرينجي بندي بئله دير:

اي وطنيم آذربايجان،

ابدي اودلاردان نيشان

آدلي، شانلي کئچميشيم وار

سن بؤيوتدون قهرمانلار

قوجا شرقين چيراغيسان

آزادليغين بايراغيسان

تاريخ بويونجا ياديگار،

ايفتيخارلي آثارين وار.

سنسن بيزه آنا وطن

سنسن بيزه نعمت وئرن.

سنسن بيزه روحي-روان،

ياشا-ياشا آذربايجان!16

بير ايل مدتينده آذربايجان تورکجه سي رسمي دؤولت ديلي اولاراقآذربايجانين بوتون دؤولت قوروملاری، علم-مدنيت، اينجه صنعت و س. مرکزلرينده ايشله ديلير. عئيني زاماندا چوخ قييمتلي اثرلر مئيدانا چيخيردي. لاکين تأسوفلر اولسون کي، همين عرفه ده قربله-شرق بلوکونون دونياني پايلاشماسي،آذربايجانين باغمسیزلیغینين ده بوردان گئتمه سي ايله نتيجه لندي. همين مسله آز دئييلدي. شاهین اوردوسو يئنيدن 1946-جي ايلدهآذربايجاني یوروش ائتديکدن سونرا قاباقکيندان دا پيس و شووينيستجه سينه آذربايجان خالقينا و اونون ديلي و مدنيتي نين اينکيشافينا مانع اولور. پهلوي رژيمي آذربايجان تورکجه سيني بوتون علم، مدنيت، اينجه صنعت و رسمي دؤولت اورقانلاريندا ياساق ائتدي. آذربايجان تورکجه سينده يازيليب، ياريديلميش بؤيوک بير مدنيتي همين ديلده اولان کيتابلارين کوتلوي شکيلده يانديريليب آرادان آپاريلماسي ايله محو ائتمه يه چاليشديلار.

پهلوي رژيمي آذربايجان ميلتيني بير ميلت کيمي اريديب فارسلاشديرماق مقصديله بوتون غئيري-اينساني و دؤزولمز مئتودلاردان ايستيفاده ائتدي. بير طرفدن ده همين ديله اولان اثرلري محو ائتدي، ديگر طرفدن ايسه همين ديلي بوتون رسمي و غئيري-رسمي ساحه لرده ياساق ائتمکله عومومن کنارلاشديردي. عئيني زاماندا آذربايجان تورکلري نين تاريخيني دييشمک و تحريف ائتمکله آذربايجانليلاردا صنعي شکيلده غيري-حقيقي کيمليک فورمالاشديرماغا و اونلاري اؤز سوي کؤکونده آييرماغاشکيلده چالشدي. همين ايشلرله ياناشي دؤولتين رسمي گؤستريشي ايله آذربايجانليلاري و عوموميتله، بوتون تورکلري وحشي، مدنيتسيز، ساوادسيز، ارتيجاچي، عئيني زاماندا گلمه و غصبکار کيمي گؤسترديلر. تحقير مئتودو ايله آذربايجانليلاري اوزگه لشمه یه اوغراتماغا چاليشديلار. عاديجه مکتبده جريمه صانديغي يئرلشديريلدي و فارسجا بيلمه ين آذربايجان اوشاقلاري بير کلمه بئله اؤز ديلينده سؤز دانيشارديسا اورا پول سالمالي ايدي.

50 ايلليک پهلوي رژيمي دؤورونده آذربايجان خالقي اؤز دوغما يوردوآذربايجاندا دؤزولمز تضييقلره معروض قالدي. هئچ کيمين بير دنه ده اولسون آذربايجان تورکجه سينده کيتاب چاپ ائتديرمه يه حاقي يوخ ايدي.

بئله آغير بوغونتو آتموسفئرينده آذربايجان ديلي و مدنيتينه چوخ بؤيوک ضربه لر وورولدو. آما بئله آغير شرايطده ده آذربايجانين غيرتلي اوغول و قيزلاري هر زامان خالقي معاريفلنديرمه يه و ديليميزه آيد گيزلي شکيلده اثرلر يازيب-يايماغا باشلاديلار. حتّی، آذربايجان ادبياتي نين 20 عصرده گؤزل شاه اثري اولان شهريارين" حيدر بابايا سالام "اثري ده بئله آغير ايللرده يازيليب بوتون دونيادا شؤهرت قازاندي. بئله آغير ايللر خالقيميزين پولاد ايراده لي موباريز شاعيرلري نين ميدانا چيخماسينا سبب اولدو. بولود قاراچؤللو سهند کيمي موباريز شاعيرلر آذربايجان موباريزه شعرينه ميثيلسيز تؤهفه لر وئرديلر. سازيمين سؤزو کيمي ديرلي اثرلر ده محض بو دؤورده و بئله آغير بوغونتو آتموسفئرينده گيزلي شکيلده يازيليب ياييليردي.

" جاببار باغچابان، صمد بهرنگي، نصرت اللهفتحي، محمدعلي محزون، محمدعلي فرزانه، يدالله مفتون اميني، حبيب ساهير و علي تبريزلي کيمي شاعيرلر، يازيچيلار قيد ائتديگيميز محدوديتلره رغمن آذربايجان تورکجه سينده اثرلر ياراداراق گيزلي شکيلده چاپ ائديب يايميشلار " .17

پهلوي رئژيمي و مونارخييا جيدي شکيلده خالق اعتيراضي ايله اوزلشدي. و نهايت 1979-جو اسلام اينقيلابي باش وئردي. اينقيلابداآذربايجانين ميللي مدني قوووه لري ده گئنيش شکيلده ايشتيراک ائديرديلره. اينقيلاب عرفه سي و اينقيلابين ايلک ايللريندهآذربايجاندا ميللي قوووه لر فعاليت ايمکاني قازانديلار و يئنه آز مودتده چوخلو تورکجه قزئت، ژورنال و کيتابلار چاپ ائديليب ياييلدي. لاکين بو جوزي دئموکراتيک آتموسفئر ده اوزون مودت سورمه دي. آذربايجان تورکجه سينده اولان قزئت و ژورناللارين اکثري نين نشري دايانديريلدي.. قانون اساسیمیزین 15-جي مادده سينه اساسن ايسه ايراندا ياشايان باشقا ميلتلر فارس ديلي ايله ياناشي اؤز ديللرينده تحصيل آلا بيلرلر. لاکين بو مادده و عئيني زاماندا آنایاسامیزین19-جو مادده سينده نظره آلينميش خالقلارين حقوقلاري نين برابرليگي تامين اولماییب و ايندييه کيمي ده همين مادده لر ايجرا ائديلمير.

آذربايجان تورکجه سي اوچونمحدود آزادليق تدريجن چوخالماقدادير. 1357-جی ايل اينقيلابيندان سونرا قئيد ائتديگيميز کيمي نيسبي دئموکراتيک آتموسفئرين نتيجه سينده آذربايجان تورکجه سينده نشرياتين سايي آرتدي. تهران، تبريز، اردبيل کيمي شهرلرده سياسي و بدیعي دونيا گؤروشو اعتيباريله ياخين آداملار موختليف درگيلر، قزئتلر نشر ائتمه يه باشلاديلار. اؤلکه ده باش وئرن ايجتيماعي حاديثه لره موناسيبتده موختليف مؤوقعلر بو نشرلرين سياسي ايستيقامتينه سياسي ايستيقامتينه، ميللي مضمونونا دا تاثيرسيز قالميردي."" وارليق "اونون آردينجا نشره باشلايان" دده قورقود" ،" اولکر " ،" کوراوغلو " ،" گونش " ،" اينقيلاب يولوندا "و" يولداش " کيمي درگيلر اينقيلابي بير اووقاتي عکس ائتديريردي. بو درگيلرين بعضيلري نين عؤمرو قيسا اولدو. ائله اولدو کي، بير سايي ايشيق اوزو گؤردو. تورک ديللي مطبوعاتين گئنيش ووسعت آلماسينا ايمکان یارادیلمادی . آنجاق ایندی بیر چوخ خبر آژانسلاریلا یاناشی آیلیق – هفته لیک فارسجا و تورکجه مطبوع اورقانلاری یاینلاماقدادیر. " .

ميللي ادبي ديل بيرليگي يارانماقدادير. ديليميزينياساق اولماسي نين اوزون مدت داوام ائتمه سي ادبي ديليميزينضعيفله ييب يوخ اولماق تهلوکه سيني آرادان قالديریلميشدير.

تاريخدن بللي اولدوغو کيمي اينديکي ايران قديمدن تورکلرين ياشاديغي و آت اويناتديغي اراضي اولموشدور. ايندي دهتورکلري نين ايزينيتکجه سيستان-بلوچيستان و ايلام ايالتلريندن باشقا دا گؤرمک مومکوندور.. آذربايجانليلارين سيخ ياشاديغي همداندان شيمالا دوغرو آذربايجانين قديم تورپاقلاريندا و حتّی بير چوخ باشقا شهر و بؤلگه لرده آذربايجان تورکلري اؤز ديللريني شيفاهي دانيشيق فورماسيندا قورويوب ساخلاميشلار.

آذربايجان ديليآذربايجاندا شيفاهي دانيشيق ديلي فورماسيندا بوتون آذربايجان شهرلرينده عومومي اونسيت واسيطه سي اولماقدان علاوهراديو، تئلئويزييالاردا ايشله ديلير و سون زامانلار ديليميزده چاپ اولان کيتاب و نشرلرين سايي نيسبتن چوخالماقدادير

ديليميزده قزئت و ژورناللارينسايي محدود اولسادا یوکسلن خطله داوام ائتمکده دیر.

حال حاضيردا اونيوئرسيتئتلرده آذربايجان تورکجه سينده اونلارجا طلبه درگيلري مؤوجوددور. همين درگيلرده آذربايجان تورکجه سينده تاريخيميز، ديليميز و مدنيتيميز حاقيندا مقاله لر و خبرلر درج ائديلير.

حال حاضرداديليميز و مدنيتيميزله باغليآذربايجانين گنج نسلي چوخ درين و کؤکلو تدقيقات آپارير و معاريفچي ايشلري ايله ديليميز ده يارانميش بوشلوغو دولدورماغا چاليشيرلار.

 آذربايجانین موختليف شهرلرينده ادبي درنکلر و اوجاقلار دا فعاليت گؤسترير. البته همين اوجاقلارین ادبي ايجلاسلاري ائولرده کئچيريلير. آذربايجاندا مدنيتسئور شخصلر، شاعيرلر، يازيچيلار و تدقيقاتچيلار ايشتيراک ائديرديلر.بونلارین ان آکتیوی صابر انجمنی دیر.بونونلا یاناشی تراکتور سازی فوتبال تاکیمینین طرفدارلاریدا دیلمیزین هیجان آهنگینی دیری ساخلاماقدادیرلار.

سون زامانلار ديقتي جلب ائدن مسله لردن بيريآذربايجان گنجلري، طلبه لري و ضياليلاري نين آذرربايجان تورکجه سينده تحصيل مرکزلرینین آچیلماسینا گوستردیکلری دقت اون پلاندادی. قونشو تورک دیللی اولکه لرین تلویزیون وئریلیشلری و اینترنت دکی ماراقلی بیلیمسل و اجتماعی پایلشیملاریدا آرامیزدا اولان دیل مسافه سینی آزالتمیشدیر. فیس بوک , اینیستا گرام و تلگرام کیمی سوسیال مئدیالاردا تورکجه میزین جانلانماسینا درین ائتگی بوراخمیشدیر.ایندی دئمک اولارکی تورکیه تورکجه سی ایله آذربایجان تورکجه سینین آنلاشیم سویه سی صفر درجه یه برابر دیر.لاکن هله ده بیزیم تورکجه میز یولون اوولینده دیر. زیرا دانیشیق اولاراق هرکس آنا دیلینی قورویوب ساخلامیشدیر. اما یازیب و یاراتماق محدودیتی قالماقدادیر.

دئمک اولارکی تورکجه میز 57 –ی ایل اینقلابیندان سونرا دینامیک پوزویسیونو ایله اولمک تهلوکه سینی آتلاتمیشدیر. و اولومOLUM مجراسینا گیرمیشدیر.

عئيني زامانداآذربايجاندا سون زامانلار ديليميز، ادبياتيميز و تاريخيميزله باغلي چوخ قييمتلي اثرلر ده جاپ ائديلير.

آذربايجاندا بو گون آذربايجان تورکجه سي نين ايشلنمه دايره سي گئت-گئده گئنيشله نير. ايجتيماعي-سياسي، ايقتيصادي و مدني زمينده بوتون ساحه لري احاطه ائتمه يه دوغرو اينکيشاف ائدير. ادبي درنکلر، ژورناللار، قزئتلر، راديو-تلويزييا و حتّی غيري-رسمي اولسا دا دانشگاهلاردا ديل کورسلاري نين تشکيلي تبليغات و س. ساحه لري احاطه ائدير.

قايناقلار

1. "وارليق" ژورنالي ن-109-2. تئهران 1377 ه.ش. ص. 27. 
2. "وارليق" ژورنالي ن-122-3 تئهران 1380 ه.ش. ص 67 
3. "سحر" ژورنالي ن- 7-8، تبريز 2001، سوه. 3 
4. م.ت. زئهتابي "ايران تورکلرينين اسکي تاريخي" تبريز 1999 و "ايلديرمي" ژورنالي ن-2، مونترال، کانادا 1999، ص.3-6 
5. "آذربايجان تاريخي" 1-جي جيلد. ز. بونيادوو و ي. يوسيفووون رئداکته‌سي ايله. باکي-1994. 
6. م.ت. زئهتابي "ايران تورکلرينين اسکي تاريخي" تبريز 1999 و "ايلديريم" ژورنالي ن-2، مونرئال، کانادا 1999، ص.3-6 
7. ارازوغلو "موختصر آذربايجان تاريخي" ص-9. 2000-جي ايل. 
8. دوکتور جاواد هئيت "آذربايجان ادبياتي تاريخينه بير باخيش" ص.5، تئهران 1980. 
9. حسن جوادي "ساتيرئ اين پئرسيان ليتئراتورئ، (فايرلاقه ديجکينسون اونيوئرسيتي پرئسس 1988، پپ 137-138 آند 142 فف. 
10."تريبون" ژورناه ن- 6، ص-295، ايسوئچ -2001 ن. 
11. "21 آذر" ژورنالي ن-11، ص- 15، باکي 2001. 
12. شئيخ محمد خييابانينين "آغيرلاما قورولتايي" مقاله و شعر توپلوسو، امير کبير اونيوئرسيتئتينين "طلبه" ژورنالي، صه-62، تئهران -2001 
13. ج. موجيري 21 آذر نئهزتينين 75 ايلليگينه هسر ائديلميش بديعي بلوکتون. ص-78. 1970. 
14. "21 آذر" ژورنالي ن-9، ص -39. باکي-2000 
15. "21 آذر" ژورنالي ن-ل، ص-30. باکي-1998 
16. "21 آذر" ژورنالي ن-2، ص-25. باکي-1999 
17. "تريبون" ژورنالي، ن-6. ص-297. ايسوئچ-2001 
18. "وارليق" ژورنالي ن-109-2، ص-36. تئهران 1998 
19. "تريبون" ژورنالي، ن-6. ص-302. ايسوئچ-2001 
20. "تريبون" ژورنالي، ن-6. ص-443. ايسوئچ-2001 
21. "سحر" درگيسي، ن-9-10، ص-1. تبريز 2002