Sorumlu müdür və Başyazar:

Dr.Hüseyn Şərqidərəcək(SOYTÜRK)

مدیر مسئول و سردبیر :

دکتر حسین شرقی دره جک (سوی تورک)

دونیامیزدا حال حاضیردا بیر چوخ دیللر یئترینجه دقت ائدیلمه دییندن یوخ اولور و یا یئرینی باشقا بیر دیله بوراخماق مجبورییتینده قالیر. البته بو آجی بیر حقیقت دیر. هر بیر دیلین اولومو ایله بیر خالق یاخود توپلولوق بوتون معنوی وارلیغی و الده ائتدیی قازانیملاریلا یوخ اولور. اونودولور و حیات صحنه سیندن سیلینیر.

بودا اینسان اوغلونون ان بویوک ایتگیسی دئمک دیر. دونیامیزدا کیم اولور اولسون ایستر اقربا توپلولوقلار و یا ایسترسه ده بیزه چوخ اوزاق اولان توپلولوقلارین مدنیتینین اولومو سوی قیریم نیته لیینده دیر.

دیل ایلک اونجه دوشونجه میزین افاده مکانیزمی اولماقلا یاناشی اوزون ایللر بیریکدیردییمیز مادی و معنوی کولتور ثروتیمیزین هم سوزجوسو هم ده قورویوجوسودور. دیل تمل وارلیقدیر.

دیل واز گئچیلمز تانری هدیه سیدیر . دیل اینسان اوغلونون سیستملی قورولوشونون اوزللیی دیر.

دیلین وارسا حیاتین و یاشامین سوردوروله بیله جکدیر. دیل هر بیر توپلومون حساس نقطه سی دیر او اوزدن ان قدار دوشمنلر اونو هدف آلیرلار. زیرا دیلسیز باش یاراماز داش دیر.

مانقورتلاشماق و داها دوغروسو مانقوردلاشدیرما معنوییاتین ان تمل تالاما متودلارینداندیر. تاریخ ده بیر چوخ اولوسلار بو مکانیزمایلا یوخ ائدیلمیشدیر.

گونوموزده بعضی آرخالی دیللر هر گون بیزلره باسقی یاپماقدادیر. بیز اونون فرقینده اولماساق بئله او دیللر اونا یاتیریلان مالیه لرین و سیاسی – اجتماعی دسته یین سایه سینده بیزیم مین ایللر الده ائتدییمیز مدنیتی چالماقدایر.

اوغورو و سالدیرقان دیللر هر گون ائولادلاریمیزی کوکوموزدن قوپارماقدادیر. اونا گوره ده آنا دیل ده تحصیل ان واجیب تمل حاقلارداندبر.

 چوخ اوزونتویله دئیه بیلرم کی بو گون بیزدن چالینانلار صاباح باشقلارینین مالی اولاجاقدیر.

علم و بیمسل قورولوشلار هر گون آنا دیللی تحصلین اونمینی وورقولاماقدادیر. بو گون بیزدن چالینان گول بالالار یارین اونلارین آنا دیللرینده بلبل تک اوته جکدیر. نه یازیق بیلمه یجکدیر کی, بو آغاج اوز کوکو اوسته بیتمه ییبدیر.

اما آنا دیلده تحصیلین بیر چوخ فایدالاری واردیر اوجورکی , آنا دیل ده اوخوماماغین بیر چوخ جبران ائدیلمز زیانلاری واردیر.

آنا دیلده تحصیل اینسانین سوز داغارجیغینی زنگین توتار و دوشونمه پروسسینی سرعتلندیرر. عقلی هوش و اجتماعی بئجرینی یوکسک توتار.

اویوشوم و سوسیاللاشمانی ساغلام قیلار.

پسیخولوژی اولاراق فردی بوشلوقلاری مثبت یونده هدایت ائدرک فرد ده اوز گوونی آرتیرار. آشاغالنمیش کمپلکسینه قارشی عوض اولونماز معالجه یونتمی دیر. ژنتیک عامیللرین فاکتیکی اولوشومونو ساغلار و گونجل توتار. حال بو کی غیری آنا دیلده تحصیل ده بو حادثه باش وئرمز. اونا گوره کی یابانجی دیل ده تمل ایتیم ایلک نوبه ده فردی اوز کولتوروندن قوپارما آماجی داشیدیغی اوچون اینسان دا اراده گوجلولویونو و عظمکارلیغی ضعیفلدر. هم ده اوزگه دیل ده اویره نیم حقیقت ده ازبرله مک اصولودور. قانا هوپماز و روح ایله بوتولشمز. نه قدر چوخ باشقا دیلده اوخوساق او قدر اوز یارادیلیش کدلاریمیزدان بیر او قدر اوزاقلاشاجاغیق. البته بوردا صحبت تمل ایتیمدن گئدیر. زیرا اوشاغین اوز گوونی سارسیر و سیلینمز روحی تروما آلیر. چونکو سئچیم گوجو اولمادیغیندان مجبوری ایتیمه تابع توتولور. مجبوریت ده هئچ واخت محبوبیت اولاماز.

ترک ائتمه و یا ضعیف سویه ده اوخوما و بیرده اوخول قورخوسو بیگانه دیلده زورلا تحصیلین نتیجه لریندن دیر. باشقا دیل ده اجباری درس حفظیت ماهیتی داشیر اونا گوره ده اویردیلن هر شئی زامان آخیمی ایله اونودولماغا محکومدور.

حقیقی تمل تحصیل هر بیر فردین ائوده دانیشدیغی دیل ده آپاریلمالی دیر. قاوراما و اوزون ایللر یادداش دا ذخیره ائدیله جک بوتون اویره نیملر یالنیز آنا دیل ده ایتیم دن ایره لی گله بیلر.

هیچ بیر فرد ایلک اونجه باشلادیغی آنا ایتمین یابانجی دیلده اولماسینی سئومز. چونکو اونو او دیل ده قاورایاجاغی سوزلر و آنلاملار یوخدور. ائله بونا گوره ده ائولرده و یا محله لرده یادا شهرلرده یایقین اولان آنا دیللرینی ایتیمله یوخ ائتمک ممکن دئییلدیر. لاکن سوز خزینه سینی آشاغایا سالا بیلرلر. اوسته گل یئرلی آنا دیلینه قارشی آپاریلان غرضلی منفی تبلیغاتلار دا خالق دا اولان اوز آنا دیلینه سئوگینی زده له یه بیلر.

بونون عکسی ده اولا بیلر . اگر مجبوری ایتیم هم ده سیاسی و نظامی هده قورخو ایله برابردیرسه او زامان مجبور ائدیلن اینسانلارین نیفرت چاناغینی داشیرا بیلر و توپلوملار آراسی قارقاشایا گتیریب چیخارا بیلر کی , اونوندا اوز منفی گوسترگه لری اولا بیلر.

آنا دیلینده تحصیل اینسان دا سایقینلیغی و اینسان سئوگیسینی هم آشیلار هم ده آرتیرار. ترسینه سایقیسیزلیقلا اوز دیلیندن اوزاقلاشدیریلان کس نهایت ده ایلک باشلانقیجدان آشاغلیق کمپلکسینه قاپیلاراق سایقین و سئوگین اولمویا بیلر.

توپلوملار هر زامان قارشیلیقلی سایقی و سئوگیله بیر بیرینه اویوم ساغلایا بیلر. آنجاق بیری سایقین او بیریسی سالقین اولورسا تاریخی نیفاقدان باشا بیر الده ائدینیمی یوخدور.

گله جه یی دوغرو قورماق ایسته ییریک ایسه ایلک اونجه بو گون بیر بیریمیزله دوزگون , دوغرو و عدالتی داورانمالییق.

کیمسه نین حاققی یوخدور کیمسه نی آنا دیلینده آناسینا مکتوب یازماقدان محروم ائتمه یه. دیللرین اولومو اینسانلارین اولومودور و بونو ائدنلر اصلینده سسسیز سوی قیریم ائتمک ده دیرلر. یوخ ائدیلمه یه معروض قالان خالق اگر بو گون سوسقوندورسا او دئمک دئییل کی او گله جک ده بو ظلمین اوجونو وانتقامینی آلمایاجاقدیر.

بو گون بیزیم سحولریمیزین آغیر حسابینی گلجک نسیللر اوده یه جکدیر.

آشاغلانمیش کیمسه دن سئوگی و حورمتله گوزلمه اوزون اوچون. یئری گلنده تاریخی یادداش اوز ایشینی گوره جکدیر.

هر کس اوزو اولسون آنجاق بیر یئرده هامی اولاق وداها گوجلو اولاق.

گئنه بیزم دیلیمیز ائوده قالدی.اوردادا چوخ گوون ده دئییل.