مدیر مسئول دکتر حسین شرقی دره جک سوی تورک

Sorumlu müdir :Dr.HÜSEYN ŞƏRQİDƏRƏCƏK SOYTÜRK

قادین اولماق  یارادیجی اولماق دئمک دیر. آنجاق یارادیجی قادین اولماق خالق و میلت اوچون تانرینین ارمغانی دیر. بئله اورنکلردن بیری ده حاقیندا قیساجا دیرلندیرمه یازدیغیم المیرا زنجانی دیر.

ائلیمیرا زنجانی(صنم)همیشه یارادیجیلیق آختاریشیندا وشعرلرین سوز روحونون سولمایان عطرینین اَن گوزل رایحه سی اولان انسانلیق و وطن سئوگیسی پئشینده دیر؛  او یاشامین عرفان دویغولاریندا دوز یولونو و اولومو(Olumu)  ترنم ائدیر اونون شعرلری انسانین داخلی حیس عالمینه نفوذ ائده رک هر کسین معنوی عالمی نی اوچورملو سارسینتلاردان قورویور.

 او هم ده سئویر و سئویلیر؛  پاییز یارپاقلاری تک جیلوه لی عشق سسینی دویورماغی باجاری؛ حکیم ابولقاسم نباتی(عندلیب قاراجا داغی) نین دئدی کیمی:

تا کی بنیاد ائیلرم رخسار جاناندان حدیث

ائیله بیل کیم ائیلر گولزار جاندان حدیث

 
صنم بوتون یارادیجیلیغیندا بویوک نباتی نین دئدی کیمی موضوعلارا باخاراق سئوگیسی نی انسانلیغی هر شئی دن اوستون توتاراق اطرافینی گولزار ائتمه گه جهد ائدیر.  و بو حدیث عشق اونون جان داماریندادیر چونکو اونون روح عالمی بویوک تورکلوکدن الهام آلیر؛  دده قورقوددان ؛  عزالدین حسن اوغلودان ؛  فضولیدان باشلایان ادراکدان قایناقلانیر .

صنم خانیمین شعری انسانلارین درین معنوی قاتلارینا نفوذ ائدیر؛  او بوتون یارادیجیلیغیندا سئوگی و محبت له یاناشی آختاریش و یئنی لیک روحونو ساخلاماقلا یاناشی موضوعونون ایچ ماهییتینی ده آچیر و اوخوجولارینا تقدیم ائدیر .

  او هرضامان روح یوکسک لیگینی سئوگی گوجو ایله قورویور؛  کلمبیالی یازیچی قابریل مارکزین دئدییی کیمی: "الهی اگر منیم امکانیم اولسایدی بوتون نیفرتیمی بوغاردیم گونشین نه واقت افق دان بویلاناجاغینی گوزله ییردیم.  الهی اگر منیم عمروم بیر قدر اوزانسایدی سئودیگیم آداملارا اونلاری سئودیگیمی بیر گون دئییردیم؛  اگر قادر الله منه بیر قدرده حیات بخش ائتسه یدی ؛  چوخ عادی گئینردیم گونشین ایلک شافاق لارینی عالمه ساچاندامن یوخودان قالخار تکجه بدنیمی دئییل روحومودا گونشین شعاع لاری قارشسیندا چیلپاقلاشدیراردیم ".

  بلی بویوک فیکیر انسانلارین دئدیگی بو اوزل کلاملار ائلمیرا خانیمین یارادیجیلق حیاتینادا دلالت ائدیر؛  چونکو او هر زامان سوزلرینی و دوشونجه سینی سئوگی و اوزگورلوک شعاع لاری ایله بزه ییر و فیکیرین تام اوره گینه قدر ائنمه یی باجاریر و قادین شعیرینده او بو اوزللیگی آچیقجا ترنم ائدیر: 

بیزه جان بخش ائدن بیر اولوی سس دی

چیلخا محبتدی ایستی نفس دی

حیاتین داددیر اوجالان سس دیر

قادینا خور باخما سرت باخیش بسدیر

کوبود باخیشلارین آمانین کسدی

ویا
گوزومون یاشلاری سوزولوب گئدیر

گوزومون یاشلارین توپلایان سئل اول

 
اجل ساچلاریمی شانه ائله ییر

تئلیمی کنارا دارایان یئل اول

صنم مجادله و مبارزه شاعری اولماقلا یاناشی هم ده رمانتیک و حزین دالغالانان شعرلرین مولفی دیر اونون شعیرلرینده قادین حاقّی انسان حاقلاری؛  وطن سئوگی و محبتی ایله یاناشی حزین لایلالارا اوخشایان عشق ترنم لی لیریک شعرلریده وار ؛  اونون شعیرلرینده چاغداشلیق لا یاناشی معین تاریخییلیک ده واردیر سیاسی اجتماعی باخیمنان دا دولغون شعیرلر یارادیجیسی اولان ائلمیرا زنجانی بشرین اخلاقی ناقص لیگینه قارشی بیر چوخ توتارلی شعیرلرین مولفی دیر.

 شعیرلری قیسا ییغینجام اولسادا معنا یوکو یئترلی دیر و چوخ ایره لیلردن خبر وئریر.

 اونون یارادیجیلیغی انسانا بویوک شاعیرلرین روحو اسینتیسینی خاطیرلادیر؛  شعیرلرینی اوخودوقجا کلاسیک لریمیزی داها دا یئنی آنلامدا خاطیرلایاجاغیق کیمی منه گلیر صنم خانیمین اثرلری او جمله دن میرزه علی اکبر صابیر ؛  معجز شبسترلی؛  آشیق علسگر؛  عندلیب قاراجا داغی(نباتی)هم ده بعضا ناظیم حیکمتی، آتیلا ایلهانی بیزه خاطیرلادیر؛  چوخ دَییرلی حیات یولداشی یورقون تورکمانلی(آرش بی)یین ده نفسی اونون سئوگی و محبت شعیرلرینده حیس اولور و دویولور.

حیات دولو عشقی ترنم ائدن هم ده بویوک آنا محبتی ایله دولو بیر آنا شاعیردیر. او اوزانلاریمیزی سئویر و اونلاری یاشادیر؛  حتی اونون شعیرلرینده معنوی ده یری چوخ یوکسک اولان آشیق ادبیاتی دا گوز اونونده بولونور؛  شعیرلری اوخوناقلی و جلب ائدیجی دیر؛  او لیریک شعیرلرینده و رمانیک اثرلرینده؛  کلاسیک بدیعی شعیر یارادیجیلیغیندا اوخوجوسونون قارشی سیندا تام صمیمی دیر؛  روح چیرپینتیلارینی قولاقلارا دویورا بیلیر؛  چونکو او یازدیغی شعر کیمی دورو و سئوگیسی کیمی اوجادیر.

اوره ک قاپیسی آچیق دیر؛  هم ده‌ اوز صمیمیتی ایله بویوکلوک‌ اولچوسودور او هر زامان خوشبتخت لیک پئشینده دیر ؛  اوزو اوچون یوخ؛  سئودیکلری اوچون و اونو سئونلر اوچون حبیب ساهیری؛   زلیم خانی؛  بهمن وطن اوغلونو؛  حسرت موغانلی نی؛  اسمایل اولکری؛  ائلچی بی ی(بهبود مرادی) ایوب کلبجرلی؛  صمد وورغون؛  نریمان حسن زاده؛  رامیز روشن؛  دده کاتیب؛  نصرت کسمنلی ؛  و دیگرتورک دونیاسی نین سوز و فیکیر انسانلارینا سیخ – سیخ مراجعت ائدن شاعیره میز همیشه سوز صفحه سینی قیزیل مصراعلارلا زنگین لشدیریر؛.

 او معنوی ثروتین بویوک خزینه اولدوغونو درک ائده رک شعیرلرینده بئله بیر قناعته گلیر کی حیاتین دوگونلو و کئشمه کشلی وضعیتینی یالنیز دوغرولوقدا و دوزلوک ده اولدوغونون زامان چوزه بیلرسن؛  میللی وارلیقیمیزا همیشه یارادیجیلیغی ایله قاتقیدا بولونان ائلمیرا زنجانی(صنم) ادبیات تاریخیمیزده ابدیلشن بایان شاعیره لریمیزدن دیر .

  هله گنج دیر داها دا دولغون یارادیجیلقلاری قاباقدادیر؛  من شخصا سیزه اوغورلار و باشاریلار دیله ییرم ؛

  یولونوز آچیق اولسون.