مدیر مسئول : دکتر حسین شرقی دره جک (سوی تورک)
Sorumlu müdür: Dr.Hüseyn Şərqidərəcək (SOYTÜRK)
تاریخینی اونودانلار باشقالارینا یئم اولورلار مطلق.
اونوتماماق لازیم کی ؛ هر بیر ساواشین 10 ایللر بویو سیلینمه ین آجی قالیقلاری واردیر. بو هم مدنی هم ده مادی اولماقلا هم ده پسیکولوژیک مسله لردیر. جان و مال ایتگیسی بیر مدت سونرا اونودولا بیلر. آنجاق عصرلر سورن نفرت پسیکولوژیسی اولوسلارین گئنو فوندوندان سیلینمه یه بیلر.
گله جه یی اولادلاریمیز اوچون تمیز و ساغلام تمللر اساسیندا قورماق ایسته ییریک ایسه او زامان دوستلاریمیزین سایینی چوخالدیب و دوشمنلریمیزین سایی ایسه مینیموما ائندیرمک لازیم دیر . چونکی گله جک بو گوندن باشلاییر.
باشقالارینین اویونونا و سیاستینه آلدانماماق گرک دیر .
چونکی او باشقالار بیزدن و بیزیم بولگه دن اوزاقدا یاشاییرلار.اونلارین مادی و معنوی مقصدلرینین چیخاری نه دییرسه اونو ائتمک ایسته ییرلر. اونا گوره بیز قارداش بولگه خالقلاری اونلارین اویونونا گلمه مه لییک.
ارمنستان کیمی منشایی بللی اولمایان دوولتجیکلرین ایپی ایله اسراییلین قویوسونا گیرمه مک لازیم.
نه واختدان کافرلر بیز اوره ک یاندیراراق دوست اولموشلار کی ؛ بو گونده اولسونلار. منجه ارمنستانین تام دققیلیی ایله صلیب ساواشینی یوروتدویو اورتادا ایکن بیز نیه اونون اویونونا گلمه لییک و قارداش آذربایجان خالقی ایله ساوشا گیرمه لییک.
دئمه لی کیرلی خریستیان و کره سل صهیونیزمین اویونلارینی بیلرک اونلارا قارشی بیر – بیریمیزله ساواشمادان تدبیرلی اولمالییق.
تورکو تورکله و فارسی مسلمانلارلا قارشی قارشییا قویان کیمدیرسه بیز اونو کشف ائتمه لیک. نه اینکی هر گون بوتایدان اوتایی هده لمک یا خو دا اوتایدان بو تایا نیفرت تومورجوقلارینین یارانماسینا شرایط یاراتماق .
8 ایل قارداش عراقلا ساواشدیق و آدینی دا قویدوق صداملا ساواشییریق حال بو کی اولن اینسانلارین آدی محمد ؛ حسن ؛ حسین ؛ زینب ومعصومه ایدی. اصلینده کافرلرین قوندارما صدامینین الی ایله هر ایکی طرفدن مسلمان قانی
آخیتدیق. چونکی اونلارین اویونلاری هر زامان کیرلی و حیله کارجاسینا دیر.
البته بیز بیر – بیریمیزله نه قدرکی قارداشجا داورانماغی اویرنمه یه جه ییک اونلار آرامیزدا نیفرت توخومو اکمه یه داوام ائده جکلر.
آذربایجان لبنان دئییل ؛ اورا بوتایدا یاشایان اینسانلارین بیره بیر اوزودور. قان و دین قارداشی دیر. اونوتمایاق کی اگر 10 میلیون آذربایجان تورکو آذربایجان جمهوریتین ده یاشاییرسا میلیونلارجا عینی جان دان و قاندان اولان مسلمان و شیعه آذربایجانلی ایسه بو تای آذربایجان دا یاشاییر. منطق دئییر کی بو ساواش اگر اولاجاقسا اونون قازانانی بیز یوخ بلکه بیزی بو ساواشا سوروکله ینلر اولاجاقدیر. بیز مسلمانلارا قالان ایسه مادی و جانی زیانلا یاناشی ابدی و ازلی خالقلار دوشمنچیلیی قالاجاقدیر.
بیلیریک کی حاکمیتلر و دوللتلر گلدی گئدردی . آنجاق خالقلار ایسه ابدی دی . گونوموزده ایکی حاکمیت بیر – بیری ایله قارشی قارشییا گله بیلر یاخود گتیریله بیلر. آنجاق بو حاکمیتلر تاریخه قووشدوقدان سونرا گله جک نسل اونلارین سحوی اوزوندن زور دورومدا قالا بیلر.
نه اولور اولسون .کیم نه اویون قورور قورسون ایستر آمریکاسی ایستر انگلیسی و اسراییلی حتی روسو و ارمنیسی . بیز بو اویونا گلمه مه لییک هیچ حتی اونو خنثی ائتمه لییک . چونکو بیز اتحاد اسلامی ایله داها گوجلو اولا بیلریک. نه اینکی موشک یا پهبادلاریمیزلا احمدلری و حسینلری اولدورمکله. ایچ ده غرب زده ایرانشهریلرین توطئه لری و خارج ده چئشیدلی دشمنلرین دسیسه لرینه بویون ایمه مک لازیم.
اگر گرچکدن بیر تهدید وارسا او تهدیدین سرچشمه سینی قوروتماق لازیم دیر. و تهدیدی خلقلری قیرقینا وئرمه دن یوخ ائتمک اصیل قازانج دیر. ساوشا یوخ دئیرک دوغرو سیاسته وعقلانی چوزومه هه دئییریک. اوتایلی حسین بوتایلی حسینی نئجه نئجه اولدوره بیلر کی ؛ یادا بوتایلی علی او تایلی علی یه نئجه گولله آتا بیلر کی. اصلین ده بیز بیر بیریمیزی سئورک و الله ین ریسمانینا کنتله نرک گوجلنمه لییک.
بوتون شیطانی قورغولارا ایچ نیفرتیمیزی آچیق شکیل ده اعلان ائدیریک . بیز بیر بدن ده اولان روحلاریق اونون جریحه دار اولماسینا ایزین وئرمه مه لییک.
صمیم قلب دن فیطیر بایرامینیزی تبریک ائدیریک. الله ین درگاهیندا اوروج و عبادتلرینیزی قبولونون تمنی ائدیرک.
1402 – جی ایلده سیزلره موفقییت و باشاریلار دیله ییریک. جان ساغلیغی آرزولاییریق. یاشاسین باریش. یاشاسین قارداشلیق. یاشاسین سئوگی و دوستلوق. محو اولسون جنگ و دوشمنچیلیک