SORUMLU MÜDÜR VƏ BAŞYAZAR:
Dr.HÜSEYN ŞƏRQİDƏRƏCƏK SOYTÜRK
مدیرمسئول و سردبیر :
دکتر حسین شرقی دره جک سوی تورک
گونشی سولغون دوغولان هر صاباح اولومه و ظولومه دعوتیه چیخارماقدادیر. الی قانلی سومورگه چیلر اینسانلیق وجدانینا میدان
اوخویور. دوغولمامیش اوشاقلارین فاتحه سی اوخونور یاشادیغیمیز بو چاغدا. اللری دعا دا اولان آنالارین آنیلاری چالینیر. سوز
یئرینه بمبالار دانیشیر بو جاهیل دونیادا.
شیطانین بوساطی آچیقدیر. حاققین درگاهی قاپالی . ائشیدیلمیر مظلومون آهی فغانی چونکی هر شیی سیاست و پارادیر .
غزه ده دوغان اومیدسیز آنانین فریادی و دوغو تورکوستاندا عاقبتی بللی اولمایان اوزگورلوکچو اینسانلاری طالعی ایران دا ات
اوزونه حسرت قالان 10 میلیون اینسانین آجلیق چیغیرتیسی بیرده سئچیلنله سئچیلمه ینلرین شورای راهبردی اویونون اوی
چالینتیسی. هرکس کولگه ده اوز آرشینی ایله خالقین بزینی اولچمکده دیر. سونموش آوروپانین چیراغی بیرده انگلیسین پاپاق اویونو
اونون دا یانیندا آمریکانین دلار فیریلداغی یئر کوره سینین اینسانینی دیزه گتیرمیشدی. آرتیق کرالین و نوکرین سیرری
چوخولموشدور. دیبی قارانلیق چاغداش سوسیال مئدییا قورغوسو هر کسی وارلیغینا یوخ ائتمک ده دیر.
ساپی بیزدن بالتاسی شوونیزمدن اولان آچیق و گیزلی مدنی سویقیریملارین ایپ اوجو گورونمکده دیر. قویون دریسین ده گزن
جاناوارلار ظریف داورانیشلاری ایله باشیمیزی قاتماقدادیرلار. فهله آج کندلی یالاواج خسته ایسه عیلاجسیز. چال عمی اوغلو چال
لاپ برک چال قوی زورنانین سسی دونیانین او باشیندا یانقیلانسین.
روحو شاد اولسون بیزیم کندیمیزین قویونلارینین. ایندی یاشاسایدیلار شامان سئوگیسی تک مقدس و اوزون عمرلو اولاردیلار.
چونکو قویون و اینک حتی اونلارین محصوللاری بئله ال چاتماز توتیایا دونوب. یازیق هورمونلو آق تویوق هله کی سنه شوکور
ائدیریک.
نه دئییم خوشجا قال وطن داش