HƏR BİR MİLLƏTİN VARLIĞININ TƏMƏL ÜNSÜRÜ ONUN ANA DİLİNDƏ TƏLİM ALMASIDIR.
SORUMLU MÜDÜR və BAŞYAZAR:
Dr.Hüseyn Şərqidərəcək (SOYTÜRK)
مدیر مسئول و سر دبیر :
دکتر حسین شرقی دره جک (سوی تورک)
تاریخ بویون اوزانیب گلمیش مدنیتلر مطلق مجادله وئرمیش مدنیتلردیر. کیمسه – کیمسه یه بورجلو دئییل کی اونون مدنیتینی قورویوب ساخلاسین و حتی گلیشدیرسین.بونا گوره هر بیر میلت اوز گوبه یینی اوزو کسمه لیدیر. دیری و یاشانیر اولماق اوچون بو گونکو نسل کئچمیش نسلین ال ده ائتدیکلرینین اوستونه بیر شئیلر قویمالیدیر. یوخسا باشقالارینین یئمی اولماقدان باشقا چیخیش یولو اولمویاجاق.
تعلیم و ایتیم هر بیر اولوسون اوز دیل و مدنیت دیرلری اساسیندا اولمالی دیرکی او میلته منسوب اولان کس یا بیریی ده میلی کیملیک اساسیندا گلیشمیش اولسون. آنا دیلین ده تحصیلی اولمایان خالقلار زامان آشیمیندا مطلق آسیمیلاسیونا معروض قالاراق اوز دیرلریندن محروم اولاجاقلار کی بودا اوزون وادی ده شخصیت و پسیکولوژی آشاغالیق کمپلکسلریله اوزلشمک دئمکدیر.
اساسا ایران جغرافیاسی و اطراف رئگیوندا تورک فوبیاسی غرب طرفیندن زهرلی فیکیر اولاراق اوز یانلیلاری طرفیندن یئرلی اصیل خالقلارا اویقولانماقدادیر. اصلینده بیزه آشیلانان مدنیت ایتیملری یئرل ایچریکلردن یوخسوندور. بیز یاشادیغیمیز اولکه ده آنا- آتامیزین دیلین ده بئله یازیب اوخوماقدان محروم اولارکن بینیمیزه یالانلارلا دولو فانتازیلر دولدورولماقدادیر. منبعی و ذاتی بللی اولمایان او قدر چوروک و انگلیس اویدورما ماتریاللارینی بیزیم اوز بودجه میزله بیزه سیراماقدادیرلار. اصلی بللی اولمایان اویدورما هند منشالی دیل و دین آب و هاوالی ماسون قایناقلی بیر سورو یالان بیلگی تطبیقینه معروض قالمیشیق. حال بو کی اگر میلی و معنوی دیرلریمیزی اوز تورکجه میزین بیزه آنلاتدیغی مفهوم دا اویرنسک او زامان یوکسک اینسانی دیرلره مالیک اولا بیلریک. اصلین ده هر مهر آیی گلنه ده میلیونلارلا اینسانیمیزی حقیقتلره ضید اولان عینی زامان دا اصلیمیزه دابان – دابانا قارشی اولان اویدورما و ایچی بوش وئریلرله اویوشدورموش اولوروق. اوخودوغوموز بیلگی خصوصیله ده اینسانی علملر یونونده هیچ بیریسی یئرلی میلی روح اویغون دئییل هیچ حتی یالان و مغرضانه دیر.
دیرلریمیزی قوروماق آماجیلا ائولادلاریمیزا اوز فولکلوریک دیرلریمیزی اویرتمک زورونداییق. بیزه کوروش یوخ بلکه دده قورقود لازیم دیر. بیزه منشایی بللی اولمایان هندوییمیز مکتبلی اساسلی خاندانلارین یئرینه اوز میلی تاریخی دولتچیلیک درسلری اویره دیلمه لی دیر. دینی دیرلریمیزی میلی و یئرلی دیرلریمیزله یاناشی غرضسیز شکیل ده اویرنمه لییک. تاریخیندن خبری اولمایان بیر میلت باشقالارین قول اولار مطلق.
گوزوم آچاندان بو آجینی یاشادیم .آتام – آنام – من و ائولادیم دیلمیزدن محروم ائدیلرک باشقا دیل ده تحصیل ائتدیریلدک. ضرب المثلریمیزی بیلمه دیک .عرف و عادتلریمیزی اونوتماق زوروندا قالدیق. وطنداشلیق حاققیمیز هیچه ساییلدی. اولان نه اولدو ؟ اویرندیمیز کوروش یا داریوش اولدو سن دئمه اوندا یالاندان عیبارتمیش.
دیله ییم بودور دولت و میلت اولاراق اویدورما افسانه لری یوخ گرچک تحصیلی قاورایاق. آنا دیلمیز ده اوخوماق بیزیم حاقیمیزدیر. عینی جبهه لرده ساشدیغیمیز کیمی. منه یوخدورسا سنه ده اولمامالی دیر. قارداشلیق قایدالارینا اویولماق زوروملودور. زورلا صبردن ستم دوغار.
بیزده ایسته ییرک کی بیزیم ائولادلاریمیز آنا دیلین ده اوخوسون و وطن سئور اولسون. وطنی و اونون اویقلامالاری تابو کیمی بیز قورخو و هده یه یوخ بلکه سئوگیه و ایمانا سووق ائتسین.
تورکون دیلی تک سئوگیلی ایسته کلی دیل اولماز
اؤزگه دیله قاتسان بو اصیل دیل اصیل اولماز
اؤز شعرینی فارسا – عربه قاتماسا شاعیر
شعری اوخویانلار ، ائشیدنلر کسیل اولماز
فارس شاعری چوخ سؤزلرینی بیزدن آپارمیش
« صابیر » کیمی بیر سفره لی شاعیر پخیل اولماز
تورکون مثلی ، فولکلوری دونیادا تک دیر
خان یورقانی ، کند ایچره مثل دیر ، میتیل اولماز
آذر قوشونو ، قیصر رومی اسیر ائتمیش
کسری سؤزودور بیر بئله تاریخ ناغیل اولماز
پیشمیش کیمی شعرین ده گرک داد دوزو اولسون
کند اهلی بیلرلر کی دوشابسیز خشیل اولماز
سؤزلرده جواهیر کیمی دیر ، اصلی بدلدن
تشخیص وئره ن اولسا بو قدر زیر – زیبیل اولماز
شاعیر اولابیلمزسن ، آنان دوغماسا شاعیر
میس سن ، آبالام ، هر ساری کؤینک قییزیل اولماز
چوخ قیسسا بوی اولسان اولیسان جین کیمی شئیطان
چوخ دا اوزون اولما ، کی اوزوندا عاغیل اولماز
مندن ده نه ظالیم چیخار ، اوغلوم ، نه قیصاص چی
بیر دفعه بونی قان کی ایپکدن قیزیل اولماز
آزاد قوی اوغول عشقی طبیعتده بولونسون
داغ – داشدا دوغولموش ده لی جیران حمیل اولماز
انسان اودی دوتسون بو ذلیل خلقین الیندن
الله هی سئوه ر سه ، بئله انسان ذلیل اولماز
چوخ دا کی سرابین سویی وار یاغ – بالی واردیر
باش عرشه ده چاتدیرسا ، سراب اردبیل اولماز
ملت غمی اولسا ، بو جوجوقلار چؤپه دؤنمه ز
اربابلاریمیزدان دا قارینلار طبیل اولماز
دوز واختا دولار تاختا – طاباق ادویه ایله
اونداکی ننه م سانجیلانار زنجفیل اولماز
بو « شهریار » ین طبعی کیمی چیممه لی چشمه
کوثر اولا بیلسه دئمیرم ، سلسبیل اولماز
استاد شهریار