SORUMLU MÜDÜR VƏ BAŞYAZAR:

Dr.HÜSEYN ŞƏRQİDƏRƏCƏK SOYTÜRK

مدیرمسئول و سردبیر :

دکتر حسین شرقی دره جک سوی تورک

بیز تورکلر یاشادیغیمیز اولکه نین اکثریتینی تشکیل ائتسک ده و ائتمسک ده هئچ ائله بیل یوخوق. ایکی یوز ایل دیر گورمزدن گلسک ده اما بیز واریق. اونا گوره واریق کی؛ اوزوموز - اوزوموزو قوروما مکانیزمینه مالیکیک. یعنی کی؛ دیلیمیزی و معنوی دیرلریمیزی همیشه غیرت چتری آلتیندا توتماغی هر بیر توپلومدان داها یاخشی بیلیریک. 

بیزه متعصب سیز دئییرلر آنجاق اوزلری شوونیستی عمللره ال آتیرلار. بیز تورکلر ساده و صمیمییک لاکن ایچیمیزده ایلیق سئوگیی هاواسی ایله یاناشی داغیدیجی قاسیرغا دا واردیر.

ایستمک و یالوارماغی اوزوموزه عار بیلریک اما پایلاشماغی دا بورج حساب ائدریک. اونا گوره ده تورک دن دیلنچی اولماز اولسا – اولسا ایشچی اولار. حالال چوره یین یاوانینی حارامین بال – قایماغینا ترجیح ائدریک. باشی آشاغی و ناموسلو و یوردسئوریک. عایله جانلی و دوست یانلییق.

اوز باشیمیزی اوزوموز ساخلاماغی یاخود اوز گوبه ییمیزی اوزوموز کسمه یی باجاران میللتیک. ظالمه عصیان مظلوما حامییک. ائله بو اوزدن ده همیشه یوخ کیمی گورونریک آنجاق واریق.

بو اوزدن دیر کی چوخلوغونو تشکیل ائتدیمیز اولکه ده جومردلییمیز سایه سینده آنا دیلیمیزده تحصیل آلماقدان همیشه لیک محروموق. 

بیز ایسته مریک ؛ آلاریق او اوزدن یالوارماریق ؛ چالشاریق. بیزی یوخ سانانلار و تحقیر گوزو ایله باخانلار البت بیر گون حساب اودرلر. تاریخ بیزیم درسلری کیتابلاریندا چوخ یازیب. اونودوب گوز یومانلار مین بیر حیله ایله بیزی کور قویانلار بیر گون یقین عمللرینین نتیجه سینی گوره جکلر. البته اربابلارینین الی آرخالاریندان چکیلن ده قاسیرغانین سویوغونو حیس ائده جکلر...