KÜLTÜRÜMÜZÜN SOLMAMASI UÇÜN İLLƏRİMİZİ QARALTDIQCA ; SAÇLARIMIZI AĞARTDIQ.
SORUMLU MÜDÜR :
Dr. Hüseyn Şərqidərəcək (SOYTÜRK)
مدیر مسئول دکتر حسین شرقی دره جک (سوی تورک)
30 ایلدیر دیلمیز و مدنیتمیزین آیاقدا قالماسی اوچون مجادله ائدیرم. 21 ایلدیر خدافرین ژونالی بو آمال اوغروندا نشر اولونور. باشیم چوخ دردلر چکدی. ایستر دوستلاردان یادا دوست اولمویان دیگرلریندن. هر داشین آلتینا الیمی قویدوم بیر ایلان یوواسی ایله قارشیلاندیم. چوخ سرت اوزلرله قارشیلاشدیم. حقیقت دن اوزاق اولان سورغولارا ایچیم قان آغلایاراق جواب وئردیم.
یالنیز قالدیم. الیمی هر کیمه دوستجاسین اوزاتدیم آرخادان وورولدوم. گوزو گوتورمه ین چوخ اولدو. گوزومو اویماق ایسته ینلر صبیرسیزلیکله فورصت قوللادیلار. غریبجه سینه چاره سیزلیکلری یاشادیم و میللتیمین احوالینا چوخ گوز یاشلاری توکدوم. گئجه می گوندوزومه قاتاراق چوخ زامان تک باشینا بو یوکو داشیدیم.
عایله یه اوزو کولگه لی قالدیم. اونلارین حاقلارینی منیم ساندیغیم مدنیته خرجله دیم. بعضا دوشونورم من نه قدر ظالمجه سینه اوز حاققلاریما ضربه لر ائندیرمیشم. یاشادیغیم توپلومدا یابانجی سانیلدیم. اوزوموزونکولرین گوزونده ایسه دوشمن کیمی آنیلدیم. آنجاق باشیمی دیک توتاراق ایچیم دکی غرورو هیچ واخت کیرلتمه دیم. بعضا حاققیمدا چوخ یانلیش قرارلار وئریلدی. حال بو کی او قرارلاری وئرنلرین مدنیت و اونون قورونماسینین نه اولدوغوندان آنلایشی بئله یوخدور. اونلارین آلدیغی معاشا قوللوق ائدیلر. من ایسه آلمادیغیم معاش ایله میللی وارلیق و کیمللیمیزی قوروماغا چالیشدیم.
هر زامان نه قدر چتین یولدا یورودویومون فرقینده اولدوغومو بیلدیم. اونا گوره ازیلمه یه قارشی اراده م دن بیر سپر حوردوم. نفسیمه یئنیک دوشمه دیم. ان یوخسول آنلاریمدا بئله چوخ زنگین ایمیش کیمی داوراندیم. دوست و دوشمنه کج دوشونمک ایذنی وئرمه دیم. یوزلر کتاب و مقاله لرله ایستر اولکه داخلی و اولکه خارجینده منسوب اولدوغوم میللتین مغرور شرفینی تبلیغ ائتدیم. هیچکس دن مادی و معنوی دستک گودمه دیم و اوممادیم. اوز گوجومه و درین و زنگین وارلیغیما آرخالاندیم.
چوخ تاسفلر ائتدیم. چونکی تره زیسی اییری چوخ نانکورلر گوردوم. سیغیناجاغا یئر بولامادیغیم زامان گوردویوم ایشین نه قدر اهمیتلی اولدوغونو یئنی دن درک ائتدیم.حیاتیمی گرام – گرام یاشادیم آنجاق اوزومون قیزارتیسینین سارالماسینا ایذین وئرمه دیم. بو گون ده باشی دیک و کونول فراحلیغی ایله دئییرم . تک باشینا باجاردیم. کیمسه نین دیکته سی اولمادیم. قورخمادیم و همیشه دوغرو اولدوم. کیمسه دن یانیت و قانیت بکله مه دیم. تورک اولاراق اونوروملا یاشادیم و خالقیما خدمت ائدیم.
یاشادیغیم و گوردویوم بوتون بو ایشلرده کیمسه نین ساغ اولونودا دویمادیم. هیچ بیری فخری تشویقات دا آلمادیم. چونکی منیم گوردویوم ایش تاریخین درینلیکلرین ده ساده و مظلوم خالقیمین گولومسه ین دوقلارینا قوناراق ابدیلشدی. حاکم سئومه دیم . اونلاردا منی سئومه دی. تانرینین حاکمیتینه ایناندیم و اوجا
رببیمین رحمتینه سیغیندیم. هئچ تاخت و تاجین الله ین وئردی سئوگی دن اوستون گورمه دیم.
گنجلر معارف و مدنیت ایشی چوخ چتین ایش دیر. معاصرلرین سنی تام باشا دوشمزلر. دورین حاکیملری ایسه سنی سئومزلر. اونا گوره بو ایش سئوگی ایشی دیر. بیزدن سونرا بو یولو داوام ائتدیرن گوزل انسانلارا صبیرلی و توقع سیز اولمالارینی توصیه ائدیرم.
پارا و پول آرزوسو اولانلار بو یولا گیرمه سین. کیرالیق قلم لرده حقیقت دن دم وورماسینلار. منیم دئدییم شرفلی و اوزگورجه سئوگی بخش ائدن بیر میسسیادیر.